311 / 324 
311
Біріншіден, кешегі көшпенділердің тұяқтары, көне заманға бір
табан болса да жақын, таза табиғат арасында жүріп, дәстүрлі, та-
биғи азық-түлікпен қоректенген дала ұлдарының денсаулығының
мықты болғандығына назар аударып, сырына ой жүгіртіп, құрмет
білдіргіміз келді. Сол кісілердің бәрі дерлік сексен жастан асып
барып қайтыс болды.
Екіншіден... Әңгіменің қызығы осында болып тұр! Мұны мен
тіпті жақында, 2016 жылдың маусым айында үй-ішімізбен Бура-
байға, ем-дом қабылдауға барғанда естіп, айран-асыр болдым!
Профессор Левиннің жүйесі бойынша адамның іш құрылысын,
әсіресе, бауырын тазалап, сауықтырудың шебер маманы, дәрігер
Күлзира Темірханқызы Сыздықова айтады.
– Шайнамай, тұтас жұтқан қазы асқазанда қорытылмай, тіке-
лей ішекке барады. Сөйтіп, бауырдағы өтті сорып, өзіне қарай,
ішекке тартып алады! Сонда, адам ағзасы артық өттен, бауырға
жиналған анау-мынау заттардан арылады! Яғни, табиғи түрде өзін-
өзі тазартады екен!
Міне, қазына қариялардың табиғи даналығы!
Тағы да Күлзира қарындасымыздың айтуынша, құрт қосқан
сорпа кәдімгі фестал сияқты әсер ететін көрінеді! Еттің артынан
ішкен қымыз да айрықша пайдалы дейді дәрігер!
Мұның бәрін арнайы медициналық білімі жоқ ауылдың шал-
дары қайдан білген десейші!
Байырғы көшпенділер етке нан қоспаған ғой!
Еттен кейін, бүгінгі тойлардағыдай әр нәрсені, тәтті-пәттіні,
жеміс-жидекті жеп, іштерін ауыртпаған.
Бүгінгі ғылымның айтып жүрген «раздельное питаниесі» осы
емес пе?!
Кейін, өркениеттің әсерімен, әрнәрсеге еліктегіштігімізден да-
ланың табиғи тамақтану дәстүрін де бұздық, денсаулығымызды да
бүлдірдік қой! Жасанды, зиянды қоспаларды қымбатқа сатып
алып, уыстап шайнап отырған қазіргі заманның қаһармандары қа-
зы жұтқан қазақтарға қарап, бір ойланып қойса жаман болмас!